Waumini wakiwa mbele ya vibanda vya biashara vilivyopo nje ya msikiti huo.

Watoto wa shule ya awali katika msikiti huo wakiwa na mwalimu wao (kulia)

 

Na Kalonga Kasati

 

TAFRANI kubwa imezuka katika Msikiti wa Masjidi Pelapela uliopo eneo la Mtakuja Vingunguti jijini Dar es Salaam baada ya viongozi wa msikiti huo kudaiwa kutafuna zaidi ya sh.milioni 20.

 

Fedha hizo imeelezwa kuwa  zilichangwa na waumini wa msikiti huo kwa ajili ya ujenzi wa msikiti mpya baada ya unaotumika kuchakaa.

 

Imamu mkuu wa msikiti huo aliyetajwa kwa jina la Hamidu Mitanga alilazimika kutoweka ndani ya msikiti huo baada ya kuendesha swala ya Ijumaa iliyofanyika jana mchana kutokana na waumini kuwa na jaziba kufuatia imamu huyo kutamuka kuwa hakuhitaji kuulizwa maswali yoyote kuhusu upotevu wa fedha hizo na kuwa uongozi uliopo utaendelea kuwepo.

 

Akizungumza na mwandishi wa habari hizi msikitini hapo Dar es Salaam leo mchana wakati wa swala ya Ijumaa mmoja wa waumini wa msikiti huo Mbarouk Mohamed Makame alikiri kuwepo kwa ubadhilifu wa fedha za waumini zilizochangwa kwa ajili ya ujenzi wa msikiti mpya.

 

“Suala la upotevu wa fedha hizo lipo na limeleta changamoto kubwa kwa waumini na kusababisha kuwepo kwa makundi mawili moja likiwa lile linalolalamikiwa kutafuna fedha hizo na lile linalotaka fedha hizo zitolewe maelezo zilipo” alisema Mzee Makame.

 

Mzee wa msikiti huo na Mwenyekiti wa Kamati ya watu 10 Saidi Ngubi alisema fedha zinazoshindwa kutolewa maelezo ya matumizi yake na viongozi wa msikiti huo zilitokana na mradi wa maji na michango ya waumini.

 

“Mimi ndiye niliyeanza kuuliza matumizi ya fedha hizo lakini viongozi hao wakawa hawana majibu na badala yake waliivunja kamati yetu na kuchagua nyingine jambo lililoleta sintofahamu” alisema Ngubi.

 

Imamu mkuu wa msikiti huo Hamidu Mitanda alisema fedha hizo zilitumika kwa ajili ya mchakato mzima wa kupata umiliki wa kiwanja ulipo msikiti huo na michoro ya ujenzi wa msikiti mpya na kuwa yeye ndiye aliyeanzisha mpango wa kupata msikiti ulio bora na si bora msikiti.

 

“Binafsi sina shida na cheo hiki cha Uimamu kwani nina shughuli zangu nyingi mkitaka kuniondoa fuateni taratibu kama zili zilizoniweka madarakani na sisi kama viongozi dhamira yetu ni kuwa na msikiti uliobora wa ghorofa na si bora msikiti” alisema Mitanga.

 

Mitanga alisema chokochoko hizo zilianza tangu mwaka 2007 ambapo tulikubaliana kila muumini kati ya waumini 205 achangie sh.5000 za ujenzi lakini waliochangia walikuwa ni waumini wachache ambapo zilipatikana sh.milioni moja tu.

 

 

Imamu huyo alisema uongozi unaoendesha msikiti huo hauko tayari kuachia madaraka kwa tuhuma hizo ambazo hazina ukweli alizodai zinachochewa na baadhi ya waumini.

 

Zantel yaipa maktaba kuu 10 m/- kununulia vitabu

Na Salum Vuai-Zanzibar

KAMPUNI ya simu Zantel, imeendelea kuipa msukumo sekta ya elimu Zanzibar, mara hii ikitoa msaada wa shilingi milioni kumi kwa Shirika la Huduma za Maktaba Zanzibar kwa ajili ya kununulia vitabu na uendeshaji wa shughuli zake.

Akizungumza katika hafla iliyofanyika leo katika jengo la maktaba hiyo Maisara mjini Zanzibar, Ofisa Mtendaji Mkuu wa kampuni hiyo Benoit Janin, amesema msaada huo unalenga kusaidia upatikanaji wa maarifa miongoni mwa jamii ya Wazanzibari.

Janin alisema, ni miongoni mwa majukumu na wajibu wa Zantel, kuhakikisha inatoa huduma bora na zenye ufanisi zinazokidhi mahitaji ya wakaazi wanaoishi mijini na vijijini na kurahisisha upatikanaji wa taarifa za elimu, habari, utamaduni na burudani.

“Upatikanaji wa maarifa kwa wanajamii ni jambo la muhimu na suluhisho la changamoto hii ni kuhakikisha tunatoa fursa sawa kwa kuwezesha kukua kwa maktaba za jamii,” alisema Janin.

Aidha alieleza kuwa, ni fahari kwa kampuni yao kusaidiana na Serikali ya Mapinduzi Zanzibar kwa kuchangia ukuaji na ustawi wa jamii.

“Tunaamini kwamba kujifunza ni muhimu kwa maendeleo ya elimu kama moja maeneo ya shughuli zake za kusaidia jamii,” alieleza Ofisa huyo.

Akitoa shukurani zake kwa Zantel, Naibu Katibu Mkuu wa Wizara ya Elimu na Mafunzo ya Amali Abdalla Mzee, aliipongeza kampuni hiyo kwa mchango wao wa miaka mingi katika kukuza maendeleo ya elimu Zanzibar.

“Tunafarijika na mchango wa Zantel katika kusaidia maendeleo ya elimu nchini, na msaada huu uliotolewa leo kwa maktaba yetu kuu utasaidia kurahisisha upatikanaji wa vitabu na hivyo kuimarisha mazingira ya utoaji maarifa miongoni mwa Wazanzibari,” alieleza.

Hata hivyo, aliiomba kampuni hiyo kuangalia uwezekano wa kusaidia maeneo mengine ya kielimu yanayokabiliwa na changamoto kadhaa, ikiwemo kukamilisha ujenzi wa baadhi ya madarasa uliokwama, pamoja na madawati.

Mapema, Mkurugenzi Mkuu wa Shirika la Huduma za Maktaba Zanzibar Sichana Mussa Foum, aliishukuru Zantel kwa msaada huo, akisema ni muhimu kwa wateja wa maktaba zake Unguja na Pemba.  

Alifahamisha kuwa, pamoja na jitihada za serikali kuziendeleza maktaba hizo, mchango wa taasisi nyengine unahitajika kutoana na ongezeko la wanafunzi na wananchi wanaohitaji huduma za maktaba. 

WAZIRI ANASTAZIA WAMBURA AKUTANA NA TFF

Naibu Waziri wa Habari, Utamaduni, Sanaa na Michezo, Annastazia Wambura leo ametembela ofisi za Shirikisho la Mpira wa Miguu Tanzania (TFF) na kupata kujionea shughuli mbalimbali zinazondeshwa na shirikiso hilo.

Akiongea na viongozi na wachezaji wa timu ya Taifa ya Wanawake “Twiga Stars” waliopo kambini kujiandaa na mchezo wa kuwania kufuzu kwa Fainali za Mataifa Afrika kwa Wanawake dhidi ya Zimbambwe, Wambura amesema Serikali itashirikiana na TFF kuhakikisha timu inapata ushindi katika mchezo huo wa awali utakaochezwa Machi 4, 2016.

Wambura amewataka wachezaji wa Twiga Stars kuwa na nidhamu ndani na nje ya uwanja, kujituma na kuiipenda kazi yao hiyo ambayo kwa sasa ni ajira itakayoweza kuwasaidia kuendesha maisha yao.

Aidha Wambura amesema anaamini kuwa Twiga Stara bado wana nafasi ya kufanya vizuri katika mchezo unaowakbalili, na kuwaomba kupambana zaidi kuhakikisha inapanda na kushinda nafasi ya kwanza Afrika katika soka la wanawake.

Pia amesema wizara yake inashugulikia maombi ya TFF kuiomba wizara ya TAMISEMI ikasimishe mchezo wa mpira wa miguu katika mashindano ya UMITASHUMITA na UMISSETA yaweze kusimamiwa na TFF kwani wao ndio wenye utaalamu wa mchezo huu.