Kuunga Mkono Mageuzi Makubwa ya Utoaji Huduma Bora Muhimbili

 

Mkurugenzi Mtendaji wa Hospitali ya Taifa Muhimbili (MNH), Profesa Lawrence Museru akitoa mada leo kwenye semina ya siku moja kwa wakurugenzi, wakuu wa idara na wakuu wa vitengo kuhusu majukumu na wajibu wao katika kutekeleza shughuli zao za kila siku.

Baadhi ya wakurugenzi, wakuu wa idara na wakuu wa vitengo katika Hospitali ya Taifa Muhimbili (MNH) wakifuatilia mada kwenye semina ya siku moja iliyofanyika Leo katika hospitali hiyo.

Mwakilishi kutoka Wizara ya Afya, Maendeleo ya Jamii, Jinsia , Wazee na Watoto, Dk. Magreth Mhando akiwaeleza viongozi hao vipaumbele ambavyo wanapaswa kuvizingatia katika utekelezaji wa majukumu yao ya kila siku.

Mkuu wa Idara ya Maslahi na Mahusiano Kazini wa hospitali hiyo, Noorani Valli akisisitiza jambo kwenye semina hiyo leo.

 Baadhi ya wakuu wa idara, wakurugenzi na wakuu wa vitengo wakifuatilia kwa makini semina hiyo leo.

Bwana Buma akiuliza swali kwenye semina hiyo leo.

Mkuu wa Idara ya Manunuzi, Bwana Pindani Nyalile akitoa mada kwenye semina hiyo leo.

Na John Stephen, Dar es Salaam    17.03. 2017

Wakurugenzi, wakuu wa idara na wakuu wa vitengo katika Hospitali ya Taifa Muhimbili (MNH), wametakiwa kutatua changamoto zinazowakabili wafanyakazi wanaowasimamia na kujali maslai yao ili kuleta mageuzi makubwa ya kutoa huduma bora kwa wagonjwa.

Mkurugenzi Mtendaji wa hospitali hiyo, Profesa Lawrence Museru ameyasema hayo leo wakati wa semina ya siku moja ya kuwakumbusha viongozi hao majukumu yao ya kila siku.

“Viongozi mnatakiwa kuwa wabunifu, msilalamike kuhusu changamoto zinazowakabili, jambo mnalopaswa kufanya ni kutatua changamoto kwa manufaa ya hospitali ya Muhimbili,” amesema Profesa Museru.

Profesa Museru amewaagiza wakuu wa idara, wakuu wa vitengo na wakurugenzi kuhakikisha MNH inatoa huduma bora kwa kuzingatia wanashiriki kikamilifu katika utekelezaji wa kujenga miundombinu ya kisasa ya kutoa tiba kwa wagonjwa.

Naye Mwakilishi Kutoka Wizara ya Afya, Maendeleo ya Jamii, Jinsia, Wazee na Watoto, Dk Magreth Mhando amesema MNH inatakiwa kuzingatia vipaumbele vya taifa katika Sekta ya Afya ambavyo ni kuboresha huduma ya afya kwa mama na mtoto ili kupunguza vifo katika kundi hilo.

Dk Mhando ametaja vipaumbele vingine ni kuweka nguvu kwenye bima za afya ili kuongeza mapato, kuweka mikakati ya kutoa mafunzo kwa ajili ya kuimarisha utoaji huduma kwa wateja na kupungunza idadi ya wagonjwa wanaokwenda kutibiwa nje kama serikali inavyosisitiza.

 

Katika hatua nyingine, Mkurugenzi wa Rasilimali Watu, Makwaia Makani amewataka wakuu wa idara na vitengo kusimamia kwa makini utendaji kazi wa wafanyakazi wanaowasimamia kwa lengo la kuimarisha utoaji bora wa huduma kwa wagonjwa.

“Mkuu wa idara anapaswa kutambua idadi ya wafanyakazi anaowasimamia na kujua kama wanaripoti kazini kila siku. Mfanyakazi ambaye hayupo kazini kwa zaidi ya miezi miwili bila ruhusa, ni mfanyakazi hewa,” amesema Makani.

 

Picha na John Stephen, Hospitali ya Taifa Muhimbili (MNH)