MAGAZETI YA LEO JUMANNE AGOST 30 2016

Mwanasheria Mkuu wa Serikali avionya vyama vya siasa

 
Mwanasheria Mkuu wa Serikali George Masaju aonya vyama vya siasa kutumia maneno yanayovunja amani na usalama wa nchi.
Masaju ambaye amezungumza na wahariri wa vyombo vya habari jijini Dar es salaam leo, ametolea mfano Oparesheni UKUTA iliyotangazwa kufanywa na CHADEMA na kusema kuwa ina maneno ya kijeshi yanayotumiwa kwenye shughuli za kihalifu.

Lema apandishwa mahakamani Arusha

 

Dar es Salaam. Mbunge wa Arusha mjini Godbless Lema amepandishwa mahakamani katika kesi mbili tofauti.

Kesi ya kwanza namba 351/2016 anatuhumiwa kumtumia ujumbe wa simu wa uchochezi Mkuu wa mkoa Arusha, Mrisho Gambo wenye maneno kuwa “Karibu tutakudhibiti kama mashoga walivyodhibitiwa Uarabuni”

Kesi ya pili namba 352/16 Lema anatuhumiwa kuhamasisha maandamano Septemba Mosi kinyume cha sheria.

Mgeja ataka Jaji Mutungi, Dk. Mwakyembe wajiuzulu

Dk. Harrison Mwakyembe

Mwenyekiti wa Tanzania Mzalendo Foundation, Hamisi  Mgeja amemtaka Waziri wa Katiba na Sheria, Dk. Harrison Mwakyembe, Msajili wa vyama vya siasa, Jaji Francis Mutungi   na Mwanasheria Mkuu wa Serikali, George Masaju, wajiuzulu kwa kile alichodai kuwa wameshindwa kumshauri Rais John Magufuli katika masuala yanayohusu Katiba na Sheria.
Mgeja pia amepinga kauli ya Rais Magufuli kutaka kupiga mnada majengo ya serikali baada ya kuhamia Dodoma.
Akizungumza   Dar es Salaam , Mgeja alisema watu hao wameshindwa kuzitumikia vema nyadhifa zao kumshauri Rais katika masuala ya Katiba na Sheria na kusababisha mvutano mkubwa unaochagizwa na kuvunjwa kwa haki za katiba za vyama vya siasa kufanya shughuli zao.

Asamoah Gyan arudi Uingereza

Nahodha wa kikosi cha soka nchini Ghana Asamoah Gyan anatarajiwa kujiunga na klabu ya Reading kwa mkopo kutoka timu ya China Shanghai SIPG.

Mchezaji huyo wa zamani wa klabu ya Sunderland anafanyiwa ukaguzi wa matibabu na klabu hiyo ya daraja la kwanza.

Gyan aliifungia mabao 30 Sunderland alipoichezea timu hiyo kwa misimu miwili,kutoka mwaka 2010 kabla ya kuelekea Al-Ain ya Umoja wa Milki za kiarabu UAE.

Alijiunga na Shanghai 2015 wakati huo na alikuwa miongoni mwa mchezaji wanaolipwa zaidi duniani.

Mkwasa ampumzisha Dida Taifa Stars, kipa wa JKT Ruvu apata ulaji

Kocha Mkuu wa timu ya Mpira wa Miguu Tanzania ‘Taifa Stars’, Charles Boniface Mkwasa, amefanya mabadiliko kwenye kikosi kinachotarajiwa kusafiri Jumatano Agosti 31, 2016 kwenda Nigeria kwa ajili ya mchezo wa mwisho wa kuwania kucheza fainali za Kombe la Mataifa ya Afrika (AFCON 2017) dhidi ya timu ya taifa ya nchi hiyo, Super Eagles.

Mabadiliko yaliyofanyika ni kwa kumchukua Kipa kinda wa JKT Ruvu, Said Kipao kuchukua nafasi ya Deogratius Munishi ambaye amefiwa na baba yake mzazi katika kifo kilichotokea jijini Dar es Salaam jana Agosti 28, 2016.

Kipao alikuwa nyota wa mchezo katika mechi ya Ligi Kuu Bara dhidi ya Simba na mechi ikaisha kwa sare ya bila bao huku yeye akionyesha umahiri mkubwa wa kuokoa michomo ya washambuliaji na viungo wa Simba.

Licha ya mchezo huo wa Septemba 3, 2016 kuwa sehemu ya mchuano wa kuwania nafasi ya kucheza fainali hizo za AFCON 2017 huko Gabon, lakini utakuwa ni wa kukamilisha ratiba baada ya Misri kufuzu kutoka kundi G ambalo mbali ya Nigeria na Tanzania, pia ilikuwako Chad ambayo iliyojitoa katikati ya mashindano.

Wachezaji wanaounda kikosi hicho kwa sasa na kuanza kuingia kambini Hoteli ya Urban Rose jijini Dar es Salaam ni:

Makipa-
Said Kipao – JKT Ruvu
Aishi Manula – Azam FC

Mabeki
Kelvin Yondani - Young Africans
Vicent Andrew - Young Africans
Mwinyi Haji - Young Africans
Mohamed Hussein – Simba SC
Shomari Kapombe - Azam FC
David Mwantika - Azam FC

Viungo
Himid Mao - Azam FC
Shiza Kichuya – Simba SC
Ibrahim Jeba – Mtibwa Sugar
Jonas Mkude – Simba SC
Muzamiru Yassin – Simba SC
Juma Mahadhi - Young Africans
Farid Mussa Tenerif ya Hispania

Washambuliaji
Simon Msuva - Young Africans
Jamal Mnyate – Simba SC
Ibrahim Ajib – Simba SC
John Bocco - Azam FC

 Mbwana Samatta - Genk ya Ubelgiji

Vyombo vya usimamizi wa Sheria vyatakiwa kutoa adhabu mbadala kwa wahanga wa dawa za kulevya nchini.

Mwenyekiti wa Bodi ya Parole nchini Dkt. Augustine Mrema (kulia) akisisitiza jambo kwa waandishi wa habari (hawapo pichani) wakati alipokutana nao mapema hii leo jijini Dar es Salaam na kuwaeleza umuhimu vyombo vya usimamizi wa sheria nchini kutoa adhabu mbadala ya kifungo cha nje kwa wahanga wa matumizi ya dawa za kulevya nchini ikiwa ni sehemu ya barua yake kwa Rais John Magufuli.

Mwenyekiti wa Bodi ya Parole nchini Dkt. Augustine Mrema (katikati) akisisitiza jambo kwa waandishi wa habari (hawapo pichani) wakati alipokutana nao kuwaeleza umuhimu vyombo vya usimamizi wa sheria nchini kutoa adhabu mbadala ya kifungo cha nje kwa wahanga wa matumizi ya dawa za kulevya nchini ikiwa ni sehemu ya barua yake kwa Rais John Magufuli, kulia ni Dkt. Bingwa wa Magonjwa ya Akili toka Hospitali ya Taifa Muhimbili Dkt. Cassian Nyandindi na kushoto ni Mkurugenzi Msaidizi Idara ya Habari Bw. Vincent Tiganya.

Baadhi ya waandishi wa habari wakimsikiliza  Mwenyekiti wa Bodi ya Parole nchini Dkt. Augustine Mrema (hayupo pichani) wakati alipokutana na waandishi hao leo jijini Dar es Salaam kuwaeleza umuhimu vyombo vya usimamizi wa sheria nchini kutoa adhabu mbadala ya kifungo cha nje kwa wahanga wa matumizi ya dawa za kulevya nchini ikiwa ni sehemu ya barua yake kwa Rais John Magufuli.

Picha zote na Eliphace Marwa – Maelezo.

Na Eliphace Marwa -MAELEZO -Dar es Salaam

MWENYEKITI wa Bodi ya Taifa ya Misamaha kwa Wafungwa (Parole) Dkt. Augustine Mrema amevitaka vyombo vya usimamizi wa sheria nchini kutoa adhabu mbadala ya kifungo cha nje kwa wahanga wa matumizi ya dawa za kulevya nchini.

Hatua hiyo inaeelezwa itawezesha kuwapatia huduma bora za matibabu ambazo ni ngumu kuzipata pindi wawapo mahabusu au wakitumikia kifungo katika magereza.

Akizungumza na waandishi wa habari leo Jijini Dar es Salaam, Mrema ambaye pia ni Mwenyekiti wa Chama cha Tanzania Labour Party (TLP) alisema katika siku za hivi karibuni kumezuga tabia kwa baadhi ya askari polisi kuwageuza mtaji wahanga wa madawa ya kulevya.

“Natoa wito kwa Jeshi la Polisi kuacha mara moja tabia ya kuwabambikia kesi wahanga hawa na badala yake washughulike na wakubwa wa wauza madawa hayo ambao wapo katika jamii na wanafahamika na hata baadhi ya Polisi” alisema Dkt. Mrema

Aidha Mrema alisema idadi ya watumiaji wa madawa ya kulevya imekuwa ikiongezeka kila kukicha nchini hatua inayoisababisha Serikali kuwa mzigo mkubwa katika kuwahudumia ikilinganisha na mahitaji yaliyopo.

Tamasha la Uhondo wa Zantel lakonga nyoyo za wakazi wa Jiji la Dar es Salaam

:Meneja Habari na Uhusiano wa kampuni ya simu za mkononi ya Zantel, Winnes Lyaro (kulia)  akitoa maelezo kwa  baadhi ya wakazi wa Boko Basihaya nje kidogo ya Jiji la  Dares Salaam mwishoni mwa wiki kuhusu huduma mpya zitolewazo na kampuni hiyo ikiwa ni moja ya mikakati ya kampuni hiyo inayokuja na mtizamo mpya katika kuboresha bidhaa zake  na kutoa huduma bora kwa wateja. Ilikuwa ni katika tamasha lililopewa jina la Uhondo wa Zantel lililodhaminiwa na kampuni hiyo.

Msanii wa muziki wa kizazi kipya anayetesa na wimbo wake maarufu wa ‘Unanitega Shemeji’, Selemani Jabil ‘MsagaSumu’ akifanya vitu vyake wakati wa tamasha la ‘Uhondowa Zantel’ lililofanyika Boko Basihaya nje kidogo ya Jiji la Dar es Salaam mwishoni mwa wiki. Tamasha hilo lilidhaminiwa na Zantel.

Meneja Habari na Uhusiano wa Kampuni ya simu za mkononi ya Zantel, Winnes Lyaro (kulia)  akitoa zawadi kwa mmoja wa washindi wa maswali ya papo kwa papo wakati wa tamasha la ‘Uhondo wa Zantel’ lililofanyika Boko Basihaya nje kidogo ya Jiji la Dar es Salaam. Tamasha hilo lililodhaminiwa na Zantel kama sehemu ya mikakati ya kampuni hiyo inayokuja na mtizamo mpya katika kuboresha bidhaa zake na kutoa huduma bora kwa wateja.

Serikali yaahidi kutoa ushirikiano kwa TECC

  Waziri wa Nchi, Ofisi ya Waziri Mkuu, Sera, Bunge, Kazi, Ajira, Vijana na Watu wenye Ulemavu, Bi. Jenista Mhagama (katikati) akikata utepe wakati wa uzinduzi rasmi wa Taasisi ya Ujasiriamali na Ushindani Tanzania (TECC) mwishoni mwa wiki jijini Dar es Salaam.  kushoto ni Mkurugenzi Mtendaji wa TECC, Bw. Sosthenes Sambua na Meneja wa Ofisi wa TECC, Bi. Mwasiti Mkembe (kulia).

Waziri wa Nchi, Ofisi ya Waziri Mkuu, Sera, Bunge, Kazi, Ajira, Vijana na Watu wenye Ulemavu, Bi. Jenista Mhagama (kushoto) akimkabidhi kitabu cha Mpango Kazi wa miaka miwili cha Taasisi ya Ujasiriamali na Ushindani Tanzania (TECC) Mwenyekiti wa Bodi ya Wadhamini ya taasisi hiyo, Bi. Beng’i Issa wakati wa uzinduzi rasmi wa TECC mwishoni mwa wiki jijini Dar es Salaam.  Bi. Beng’i pia ni Katibu Mtendaji wa Baraza la Uwezeshaji Wananchi Kiuchumi (NEEC).

Waziri wa Nchi, Ofisi ya Waziri Mkuu, Sera, Bunge, Kazi, Ajira, Vijana na Watu wenye Ulemavu, Bi. Jenista Mhagama (kulia) akiongea na Mwenyekiti wa Bodi ya Wadhamini ya Taasisi ya Ujasiriamali na Ushindani Tanzania (TECC), Bi. Beng’i Issa (wa pili kulia); mjumbe wa bodi hiyo, Dkt. Hassan Mshinda (katikati) na Mkurugenzi Mtendaji wa TECC, Bw. Sosthenes Sambua (kushoto) wakati wa uzinduzi rasmi wa taasisi hiyo mwishoni mwa wiki jijini Dar es Salaam.  Bi. Issa pia ni Katibu Mtendaji wa Baraza la Uwezeshaji Wananchi Kiuchumi (NEEC) wakati Dkt. Mshinda pia ni Mkurugenzi Mkuu wa Tume ya Sayansi na Teknolojia (COSTECH).

Sehemu ya wadau mbalimbali walioshiriki uzinduzi rasmi wa Taasisi ya Ujasiriamali na Ushindani Tanzania (TECC) mwishoni mwa wiki jijini Dar es Salaam.   Habari/Picha Na Ally Daud.

Serikali imeahidi kutoa ushirikiano kuhakikisha Taasisi ya Ujasiriamali na Ushindani Tanzania (TECC) inastawi na kufaidisha wananchi kwa kupitia miradi yake mbalimbali kwa maendeleo ya watanzania na nchi kwa ujumla.

Akizungumza hayo katika uzinduzi rasmi wa TECC Waziri wa Nchi, Ofisi ya Waziri Mkuu, Sera, Bunge, Kazi, Ajira, Vijana na Watu wenye Ulemavu, Bi. Jenista Mhagama amesema kuwa watendelea kuwa pamoja na Taasisi hiyo ili kufikia malengo ya watanzania kiuchumi.

“Kwa niaba ya serikali natambua mchango wa wajasiriamali hivyo tupo pamoja na TECC kwa kila jambo watalofanya kwa ajili ya kusapoti uchumi wa nchi kupitia ujasiriamali katika kuelekea uchumi wa viwanda.” Alisema Mhe. Jenista

Mbali na hayo Mhe. Jenista amesema kuwa malengo ya  TECC ni kuimarisha ubunifu na ushindani wa biashara ndogo na za kati za Tanzania kwa kuwavuta wajasiriamali waliopo ndani ya sekta isiyo rasmi, wahitimu wa vyuo na wengine wenye kutaka kuanzisha biashara zinazoongeza thamani kwa mazao na kutengeneza bidhaa nchini.

Aidha Mhe. Jenista amesema kuwa Biashara zikianzishwa nyingi na nyingi zikijipanua kiushandi ndivyo na serikali itapata mapato zaidi kupitia kodi hivyo uzalishaji uongezeke zaidi na zaidi kwa maendeleo ya nchi.

Chama cha Waajiri (ATE) chazindua tuzo za Waajiri Bora 2016 jijini Dar leo

Mkurugenzi Mtendaji wa Chama cha Waajiri Tanzania (ATE), Dk. Aggrey Mlimuka (kushoto), akizungumza na waandishi wa habari jijini kuhusu tuzo za Mwajiri Bora 2016 zinazotarajiwa kutolewa mwezi Disemba mwaka huu.  Hafla hiyo ilifanyika katika ofisi za ATE,jijini Dar es Salaam leo. Kulia ni Mkuu wa Masoko, Mawasiliano na Mradi, Joyce Nangai.

Mkuu wa Masoko, Mawasiliano na Mradi, wa Chama cha Waajiri Tanzania (ATE), Joyce Nangai (kushoto) akizungumza katika mkutano huo na waandishi wa habari jijini Dar es Salaam leo. Kushoto ni Mkurugenzi
Mtendaji wa ATE, Dk. Aggrey Mlimuka.

Baadhi ya waandishi wa habari wakirekodi wakati Mkurugenzi Mtendaji wa ATE, Dk Aggrey Mlimuka akizungumza nao kuhusu tuzo za mwaka huu za Waajiri Bora zinazotarajiwa kutolewa baadae mwaka huu.

Chama cha Waajiri Tanzania (ATE) leo kimezindua Tuzo ya Mwajiri Bora wa Mwaka 2016 kutambua Waajiri wenye misingi bora ya usimamizi wa nguvu kazi na rasilimali watu  ili kuwawezesha kutimiza wajibu wao kwa ajili ya kuongeza uzalishaji kibiashara.

Akizungumza kwenye Mkutano na Waandishi wa Habari, Mkurugenzi Mtendaji wa ATE Dkt. Aggrey Mlimuka alisema kwamba lengo kuu la Tuzo ya Mwajiri Bora wa Mwaka ni kutambua wanachama wenye sera nzuri za usimamizi wa rasilimali watu.  

Alisema kuwa kwa miaka kadhaa tuzo hiyo imesaidia kuhamasisha wanachama kujikita katika kushughulikia masuala ya ajira na usimamizi wa rasilimali watu kama msingi muhimu katika kumwezesha mwajiri kuwa na wafanyakazi wenye kukikidhi ushindani, wanaojituma na wenye furaha.

Aliongeza kuwa tuzo hiyo ilifuata mbinu za kisayansi na kitaalamu ili kuangalia  umuhimu wa Rasilimali Watu katika makampuni ya kibiashara kuanzia makampuni  makubwa kwa madogo na yale ya kati ili kuinua ujuzi na kuwa na wafanyakazi wenye kufanaya kazi kwa kujituma kama njia ya kutoa motisha kwa wafanyakazi ambao ndio msingi wa rasilimali watu.

Aliongeza kuwa EYA lilikuwa tukio muhimu linalofanywa na ATE kila mwisho wa mwaka tangu mwaka 2005.  Alisema kuwa tuzo hiyo imekuwa maarufu hapa nchini katika muktadha wa biashara hasa kwa kuhamamasisha makampuni makubwa na madogo na ya ukubwa wa kati kuhusu umuhimu wa kuzingatia misingi bora ya kufanya biashara nchini.

Aliongeza kuwa tukio hilo la kutafuta mshindi limegawanyika katika makundi makuu mawili ambapo litaanza na kufanya utafiti kwa kutumia Mshauri Mwelekezi na hatua ya pili itakuwa ni hafla ya kutoa tuzo yenyewe kwa washindi ambalo litafanyika mwezi Desemba 2016.

“Tukio hili limegawanyika katika makundi mawili, ambapo hatua ya kwanza ni kufanya utafiti na hatua ya pili ni hafla ya kutoa tuzo kwa washindi,” alisema.

Tahadhari ya kiafya yatolewa kupatwa kwa jua

Tukio la kupatwa kwa jua

Tahadhari imetolewa kwa wakazi wa mikoa ambayo itashuhudia kupatwa kwa jua kuwa kutazama jua moja kwa moja bila kutumia kifaa chochote kunadaiwa kuwa na madhara kwa mtazamaji kutokana na mionzi ya jua hilo.

Kupatwa kwa jua kunatarajiwa kutokea katika mikoa ya Nyanda za Juu Kusini ya Njombe wilaya ya Wang'ing’ombe katika kijiji cha Litundu, Mbeya wilayani Mbarali katika kijiji cha Mpungarelini na mkoani Katavi ambako kupatwa kwa jua kutaonekana vizuri kwa zaidi ya asilimia 97.

WCB Wasafi kufungua ofisi mpya Kijitonyama

Label ya WCB Wasafi ya Diamond Platnumz inafungua ofisi mpya Kijitonyama jijini Dar es salaam ambayo itakuwa inajihusisha na masuala ya kiuongozi zaidi.

Akiongea katika kipindi cha Clouds E cha Clouds TV Jumatatu hii, mmoja kati ya viongozi wa juu wa label hiyo, Sallam, amesema wanafungua ofisi mpya ili kuipa nafasi ofisi ya zamani ya kufanya shughuli zake bila kuingiliana na shughuli zingine.

“Tunafungua ofisi nyingine ya WCB Kijitonyama,” alisema Sallam.“Hii itakuwa kwa ajili ya viongozi, halafu ile nyingine nitaendelea na kazi nyingine,”

WCB kwa sasa ni moja kati ya label za muziki ambazo zinafanya vizuri kutokana na wasanii wake wengi kufanya vizuri.

Shamsa Ford kufunga ndoa Ijumaa hii

 
Msanii wa filamu Shamsa Ford anatarajia kufunga ndoa Ijumaa hii na mfanyabiashara wa nguo aitwae ‘Chidi Mapenzi’.

Muigizaji huyo ameiambia FOFAMMEDIA kuwa ndoa hiyo itafanyika nyumbani kwa wazazi wake Sinza Africana jijini Dar es Salaam.

“Kweli bhana Ijumaa hii Mungu akipenda nafunga ndoa,” alisema Shamsa Ford.

Miezi mitatu iliyopita mfanyabiashara huyo alikiri kuwa kwenye mahusiano na malkia huyo wa filamu na kuweka wazi mpango ya ndoa.

Waziri Nape Nnauye awataka Watanzania kuwapa Moyo Wanamichezo nchini.

Waziri wa Habari, Utamaduni, Sanaa na Michezo, Mhe. Nape Nnauye (Mb) (kulia) akimkabidhi cheti Mwanariadha Alphonce Simbu baada ya kuibuka mshindi wa nafasi ya tano katika Mashindano ya Olimpiki yaliyomalizika hivi karibuni mjini Rio, Brazil.

Waziri wa Habari, Utamaduni, Sanaa na Michezo, Mhe. Nape Nnauye (Mb) (kulia) akimkabidhi King’amuzi cha Kampuni ya DSTV Mwanariadha Alphonce Simbu baada ya kuibuka mshindi wa nafasi ya tano katika Mashindano ya Olimpiki yaliyomalizika hivi karibuni mjini Rio, Brazil.

Rais wa Shirikisho la Riadha Tanzania (RT) Bw. Anthony Mtaka akiongea na baadhi ya Viongozi, wageni waalikwa pamoja na Wanamichezo (hawapo pichani) walioshiriki katika Mashindano ya Michezo ya Olimpiki yaliyomalizika hivi karibuni mjini Rio, Brazil.

Mwenyekiti wa Kamati ya Olimpiki (TOC) Bw. Filbert Bayi akiongea na baadhi ya Viongozi, wageni waalikwa pamoja na Wanamichezo (hawapo pichani) walioshiriki katika Mashindano ya Michezo ya Olimpiki yaliyomalizika hivi karibuni mjini Rio, Brazil.

PICHA ZOTE NA BENEDICT LIWENGA-WHUSM.

Na Benedict Liwenga-WHUSM.

Waziri wa Habari, Utamaduni, Sanaa na Michezo, Mhe. Nape Nnauye amewataka Watanzania kujifunza kuwatia moyo Wanamichezo wanaposhiriki katika michezo mbalimbali ndani na nje ya nchi.

Wito huo ameutoa jana Jijini Dar es Salaam wakati wa Hafla ya kuwapongeza na kupokea bendera ya Taifa toka kwa Wanamichezo ambao walishiriki katika Mashindano ya Olimpiki yaliyomalizika hivi karibuni mjini Rio, nchini Brazil.

Pius Msekwa amewaasa watanzania kuacha kufuata mkumbo wa kisiasa

Spika wa zamani wa Bunge la Jamhuri ya Muungano wa Tanzania, Pius Msekwa amewaasa watanzania kuacha kufuata mkumbo wa kisiasa badala yake watii mamlaka ili kuepuka kuvunja sheria na kuleta madhara kwao binafsi na taifa kwa ujumla.
Msekwa aliyasema hayo  jijini Dar es Salaam wakati akizungumzia masuala mbalimbali kuhusu mwenendo wa siasa za hapa nchini na utendaji kazi wa Serikali ya Awamu ya Tano chini ya uongozi wa Mhe. Dkt. John Pombe Magufuli. Alieleza kuwa watu wengi wana hulka ya kufuata mkumbo kwenye mambo fulani bila ya kuchunguza na kufahamu ukweli wake kabla ya kushabikia.

Hatimaye Drake na Rihanna mambo hadharani

   ukufikie popote ulimepo wewe shabiki wa Robyn Rihanna Fenty ‘Riahanna’ ama Aubrey Drake Graham ‘Drake’. Kwa miezi kdhaa, kukuwepo na tetesi kuwa Rihanna na Drake wnatoka kimahaba licha ya wao kukanusha na kusema kuwa ni washkaji tu!

 Jana hali imekuwa tofauti baada ya mastaa hao kuamua kuanika hadharani mahusiano yao kwa kupeana malovee mbele ya maelfu ya mashabiki waliokuwa umefurika kwenye shoo ya ugawaji wa Tuzo za VMA nchini Marekani.

Radio 5 FM na Magic FM zafungiwa kwa muda usiojulikana

 
Waziri wa Habari, Utamaduni Sanaa na Michezo, Nape Nnauye ametangaza kuvifungia kwa muda usiojulikana vituo viwili vya Redio kurusha matangazo yao.
Waziri Nape ametangaza uamuzi huo hivi punde katika mkutano wake na waandishi wa habari ofisini kwake jijini Dar es Salaam na kuzitaja redio hizo kuwa ni Radio 5 FM ya Arusha na Radio Magic FM ya jijini Dar es Salaam.

Misri imepitisha sheria kali dhidi ya Ukeketaji

Picha inayopinga ukeketaji

Mamlaka nchini Misri imeongeza adhabu kwa yeyote atakae walazimisha watoto wa kike kukeketwa. Sheria imependekeza kifungo gerezani kati ya miezi mitatu hadi miaka mitatu kwa mtu atakaepatikana na hatia.Huku baraza la mawaziri limepitisha mpango wa kifungo cha gerezani kati ya miaka mitano hadi saba.

Hukumu ya miaka kumi na mitano inaweza kutumika pale ambapo kitendo hicho cha ukeketaji kitasababisha ulemavu. Ukeketaji umekuwa ni suala lisilokubalika kisheria nchini misri tangu mwaka 2008 lakini vitendo hivyo vya ukeketaji vimekuwa vikienea kila uchao nchini humo.

Jose Mourinho ampiga mkwara Rashford

Jose Mourinho na kiburi chake aisee. Ungeweza kudhani angetoa maneno ya kufariji kwa kinda Marcus Rashford baada ya juzi kuibuka na ushujaa wa dakika za mwisho katika pambano gumu dhidi ya Hull City ugenini. Mourinho bado hajalainika kirahisi hivyo.
Rashford alitokea katika benchi akichukua nafasi ya Juan Mata katika dakika za mwisho za pambano hilo la kusisimua lililopigwa Uwanja wa KCOM jijini Hull na dakika chache baadaye akaifungia Man United bao la ushindi.
Rashford bado hajaanza mechi yoyote chini ya Mourinho licha ya kutamba katika msimu uliopita akiwa na Kocha aliyetimuliwa, Louis van Gaal kiasi cha kuitwa katika kikosi cha timu ya taifa ya England kilichoshiriki michuano ya Euro nchini Ufaransa.

MAGAZETI YA LEO JUMATATU AGOST 29 2016