Maadhimisho ya siku ya kimataifa ya familia mei 15 2016

WIZARA YA AFYA, MAENDELEO YA JAMII, JINSIA, WAZEE NA WATOTO

(TAARIFA KWA UMMA)

TAARIAFA YA WIZARA YA AFYA, MAENDELEO YA JAMII, JINSIA, WAZEE NA WATOTO KUHUSU MAADHIMISHO YA SIKU YA KIMATAIFA YA FAMILIA INAYOADHIMISHWA TAREHE 15 MEI, 2016 

Tarehe 15 Mei ya kila mwaka, Tanzania inaungana na nchi nyingine wanachama wa Umoja wa Mataifa kuadhimisha Siku ya Kimataifa ya Familia. Maadhimisho haya yametokana na Tamko la Baraza la Umoja wa Mataifa Na. 47/257 la tarehe 20 Septemba, 1993, linalohimiza nchi wanachama kuwa na siku maalum ya Familia.

Lengo la Maadhimisho haya ni kutambua umuhimu wa familia kama kitovu cha Maendeleo katika jamii na pia kuzienzi familia kwa kuzipa siku maalum ya maadhimisho kuwezesha kutekeleza shughuli mbalimbali za maendeleo. Aidha, kutambua kuwa uzingatiaji wa masuala ya maendeleo ya kijamii na kiuchumi hupaswa kujadiliwa, kupangwa na kutekelezwa kuanzia ngazi ya familia kwa ajili ya kuimarisha ushiriki thabiti wa jamii katika maendeleo ya taifa lao. 

 Mwaka 2016, Tanzania itaadhimisha siku hii katika ngazi ya mikoa na wilaya kulingana na taratibu na mazingira ya mikoa husika. Maendeleo ya nchi hayawezi kufikiwa kama familia hazitakuwa na afya bora. Kwa kutambua hili, Kauli mbiu ya Maadhimisho ya Siku ya Kimataifa ya Familia 2016 inasema: “Familia Yenye Afya Bora ni Mwanga wa Maendeleo”. 

Kauli mbiu hii inalenga kuchochea mafanikio ya malengo ya Maendeleo Endelevu yatakayozingatia uboreshaji wa huduma ya afya bora ya familia zetu, kuwa na malezi bora ya watoto na kusisitiza utunzaji wa afya ya wanajamii wenye mahitaji maalum wakiwemo wazee na watu wenye ulemavu. Wizara inatoa wito kwa kila mwanafamilia kushiriki maadhimisho ya Siku hii muhimu kwa kufanya shughuli mbalimbali za kimaendeleo. Aidha, tunaomba vyombo vya habari kuwaelimisha wananchi kuhusu umuhimu wa Maadhimisho haya ili kuharakisha uboreshaji wa afya za wanafamilia wote katika nchi yetu.  

                                                                           Erasto T. Ching’oro (Msemaji)

                                    Wizara ya Afya, Maendeleo ya Jamii, Jinsia, Wazee na Watoto