Mhandisi John Shauri : Mabasi ya Mwendokasi bure ni kuwezesha watumiaji kupata elimu ya Usafirishaji

Na. Chrispino Mpinge

ABIRIA wa mabasi ya mwendo wa haraka wametakiwa kupanda bure mabasi hayo hadi siku ya mwisho tarehe Jumapili Mei 15 mwaka huu kabla ya kuanza kutozwa nauli

Akizungumza katika kipindi Maalum cha “Malumbano ya Hoja” kilichorushwa jana (Mei 12, 2016) katika Kituo cha Televisheni cha ITV, Mkurugenzi wa Mfumo na Uendeshaji wa Wakala wa Usafiri wa Haraka jijini Dar es salaam (DART) Mhandisi John Shauri, Utaratibu huo umepangwa ili kuwawezesha watumiaji wa mabasi hayo kupata elimu ya uelewa kuhusu taratibu za huduma ya usafirishaji zinazotolewa na mabasi hayo.

Mhandisi Shauri aliwataka abiria wanaotumia mabasi hayo yanayofanya safari zake Kivukoni – Kimara,  Kivukoni – Morocco, Kariakoo – Kimara na Kariakoo – Morocco kuitumia vyema fursa ya elimu ya uelewa itakayotolewa na wafanyakazi wa mradi huo walipo katika vituo  vya mabasi.

Aliongeza mfumo wa usafirishaji wa mabasi umezingatia pia mahitaji ya watu wa makundi maalum wakiwemo walemavu, ambapo mwanzo na mwisho wa vituo hivyo kuna mageti maalum sambamba kutenga  viti maalum ndani ya mabasi hayo vitavyotumiwa na watu wenye ulemavu.

Kwa upande wake Kamanda Mkuu wa kikosi cha Usalama Barabarani  Wilaya ya Kinondoni  SSP Awadhi alisema pamoja na kuwepo mradi huo sheria za barabani zinapaswa kufuatwa na waendeshaji wa mradi huo  pamoja na wananchi kwa ujumla, vilevile  ili wote kwa pamoja wakaelewa matumizi ya mabasi hayo na kufata utaratibu uliowekwa.

Naye Meneja Uhusiano wa UDA, Bwana Dennis Mgaya aliwataka abiria  wapande mabasi hayo kwa kutumia vituo vilivyopo kwa dhamira ya kujifunza, badala ya kutumia muda mwingi kuzunguka ndani ya mabasi hayo.

Jumla ya mabasi yaendayo haraka 138 yamewasilia nchini  kwa ajili kutoa huduma ya usafirishaji kwa jiji la Dar es salaam ili kupunguza msongamano kwa wakazi wa jiji hilo, na tayari mabasi hayo yameanza kutoa huduma  tangu mwanzo wiki.