Zaidi ya wakazi 80,000 Ngorongoro waokolewa 'kufa' kwa Njaa

Mamlaka ya hifadhi ya Ngorongoro kupitia baraza la wafugaji tarafa na Ngorongoro imeanza kusafirisha shehena ya mahindi kwa wakazi wa Ngorongoro kutoka ghala la taifa la chakula ili kutatua tatizo la njaa linalowakabili zaidi ya watu elfu themanini wanaoishi ndani ya mamlaka  hiyo ambapo  kwa awamu ya kwanza imetoa tani mia tisa zitakazo sambazwa kwenye kaya elfu ishirini.

Akizungumza  katika zoezi la kupakia mahindi hayo  mwenyekiti wa bazara la wafugaji Ngorongoro Edward Maura amesema mkataba waliyoingia ni kununua zaidi ya tani elfu tatu kwaajili ya wakazi hao  kuepuka ghalama za wananchi kuuziwa gunia moja la mahindi kwa shilingi lakimoja kutoka kwa walanguzi  wakati hawana fedha.

Mwenyekiti wa kamati ya lishe na usalama wa chakula kutoka baraza la wafugaji Ngorongoro Godfrey Lenia amesema  mkataba huo ni wa miaka mitano ambapo kila robo ya mwaka wananchi watapatiwa gunia  elfu kumi na nane za mahindi  sawa na tani miatisa kwa ajili ya watu wanaosumbuliwa kwa njaa ndani ya hifadhi hiyo.

Awali wakisaini mkataba wa kunua mahindi na ghala la taifa la chakula mhifadhi mkuu wa mamlaka ya hifadhi ya Ngorongoro redy Manongi amesema serikali kupitia mamlaka ya Ngorongoro itaendelea kutoa chakula kwa wakazi hao  ili kuimaRisha uhifadhi kwakuwa hawaruhusiwi kulima ndani ya hifadhi hiyo.