Ndugai: Wabunge hawajui wengi majukumu yao

Spika wa bunge la Jamuhuri ya Muungano wa Tanzania Mhe Job Ndugai amekiri uwepo wa wabunge wapya kwenye bunge la 11 ambao ni asilimia 70 ya wabunge wote ni changamoto kubwa katika uendeshaji wa vikao vya muhimili huo kwani wengi wao bado hawajui majukumu yao kutokana na kutozifahamu kanuni.

Mhe Ndugai anabainisha changamoto hiyo mbele ya wajumbe kutoka nchi za jumuiya ya Nordic pamoja na washirika wa maendeleo kutoka shirika la maendeleo la umoja wa mataifa (UNDP) ambao ni wafadhili wa mradi wa kuwajengea uwezo wabunge na watumishi walipomtembelea ofisini kwake ambapo amesema wabunge wapya wanahitaji mafunzo ya kina kuhusu masuala ya kibunge

Kwa upande wake mkuu wa msafara wa wajumbe hao ambaye ni muwakilishi wa UNDP nchini Alvaro Rodriguez amesema pamoja na mambo mengine ujumbe huo unaamini kupitia bunge la Tanzania itafikia malengo yake endelevu ifikapo mwaka 2030 huku wakipongeza mpango wa Tanzania wa kutaka kuwa na asilimia 50 kwa 50 ya wabunge wanaume na wanawake.

Aidha ujumbe huo pia ukatembelea miradi mbalimbali ya maendeleo chini ya ufadhiliwa na UNDP pamoja na wajasiriamali ikiwemo wasindikaji wa mafuta ya alizeti kanda ya kati ambao wameomba serikali na wahisani hao kuangalia namna ya kuongeza thamani ya bidhaa hiyo ili iweze kumudu soko la ushindani la ndani na nje ya nchi.