Mhe. Mohammed Raza ameunga mkono vita dhidi ya dawa za kulevya inayoendeshwa na Serikali ya Awamu ya Tano.

Kada wa Chama cha Mapinduzi na Mwakilishi wa Jimbo la Uzini, wilaya ya Kati,Mkoa wa Kusini Unguja akizungumza na waandishi wa habari (hawapo pichani) leo Jijini Dar es Salaam, kuhusu kuunga mkono juhudi za Serikali ya Awamu ya Tano chini ya Amiri Jeshi Mkuu Rais Dkt. John Pombe Magufuli katika vita dhidi ya dawa za kulevya nchini.

Kada wa Chama cha Mapinduzi na Mwakilishi wa Jimbo la Uzini, wilaya ya Kati,Mkoa wa Kusini Unguja akizungumza na waandishi wa habari katika ukumbi wa Idara ya Habari – MAELEZO leo Jijini Dar es Salaam, kuhusu kuunga mkono juhudi za Serikali ya Awamu ya Tano chini ya Amiri Jeshi Mkuu Rais Dkt. John Pombe Magufuli katika vita dhidi ya dawa za kulevya nchini.

Picha zote na: Frank Shija – MAELEZO.

Na. Lilian Lundo – MAELEZO

Kada wa Chama cha Mapinduzi (CCM) na Mwakilishi wa Jimbo la Uzini, Mkoa wa Kusini Unguja, Mhe. Mohammed Raza ameunga mkono vita dhidi ya dawa za kulevya inayoendeshwa na Serikali ya Awamu ya Tano.

Raza ameyasema hayo leo, Mjini Dar es Salaam alipokuwa akiongea na vyombo vya habari juu ya vita hiyo ya dawa za kulevya inayoendelea nchini.

“Naunga mkono juhudi zinazofanywa na Serikali ya Awamu ya Tano chini ya Rais Dkt. John Pombe Magufuli ni imani yangu vita hii dhidi ya dawa za kulevya tutaishinda, kama tulivyomshinda nduli Idd Amini,” alifafanua Raza.

Aliendelea kwa kusema kuwa, kila Mtanzania anatakiwa kuwa na uchungu na nchi yake kwa kuunga mkono vita dhidi ya dawa za kulevya kwa kuwa biashara hiyo inadhoofisha nguvu ya Taifa.

Aidha amesema kuwa dawa za kulevya ni janga la Dunia nzima na uwezo wa kuliondosha kwa Tanzania unahitaji ushirikiano wa Serikali zote mbili za Tanzania Bara na Visiwani na wananchi wake.

Hata hivyo, Raza ameiomba Serikali kununua vifaa vya kisasa vitakavyosaidia kutambua dawa za kulevya ili kuzuia uingizaji wa dawa hizo hapa nchini, hasa kwa Zanzibar ambayo imezungukwa na bahari hivyo kurahisisha uingizaji kutokana na kutokuwepo kwa vifaa hivyo.

Katika hatua nyingine Raza amempongeza Rais Dkt. Magufuli kwa kurejesha maadili kwa watanzania na viongozi tofauti na ilivyokuwa hapo zamani.

Amesema kuwa haikuwa rahisi kwa mtoto wa mkulima kupata ajira lakini kwa Serikali Awamu hii watanzania wote wamekuwa na thamani bila kubaguliwa kutokana na kipato, rangi, kabila au dini zao.